لا تنسوا أهلنا من صالح الدعاء,اللهم إنّا استودعناك اياهم، اللهم كُن عوناً لهم، اللهم انصرهم واحفظهم. 🇵🇸 🇸🇩
أهلًا وسهلًا بكم في العدد 111 من النشرة الأسبوعية لاقرأ-تِك 🚀
سواء كنت مهندس برمجيات مبتدئ أو محترف، فنشرتنا هتساعدك على مواكبة أحدث تطورات عالم البرمجة بمواضيع جديدة كل أسبوع، هتلاقى كمان محتوى عملي بيشمل أفضل الممارسات، ونصائح مفيدة، وترشيحات لمقالات مختارة من اقرأ-تِك.
الـ AI agents بقوا كتير لدرجة إن الأدوات اللي اتعودنا عليها بقت محتاجة هي كمان تتغيّر عشانهم!
شركة Anthropic اضطرت تسيب Git لأن الـ agents عملوا merges بشكل كبير، و ChatGPT بطّل يرد بنص بس وبقى يبني UI مخصص ليك، و Figma عملت نظام مكتوب عشان الـ agents يعرفوا يصمموا صح.
🌟 مواضيع النشرة لهذا الأسبوع 🌟
GPT-6 and Intelligent UI in ChatGPT
Anthropic Ditched Git and Built Scion
Figma announces Specs to help guide AI agents
GPT-6 and Intelligent UI in ChatGPT
شركة OpenAI نزلت GPT-6 لكل مستخدمين ChatGPT .. بس الموديل نفسه مش هو الخبر الأهم وده لإن الأهم هو الميزة اللي جت معاه وهي الـ Intelligent UI.
يعني إيه Intelligent UI؟
بدل ما ChatGPT يرد عليك بشوية نصوص أو Texts زي اللي اتعودنا عليها، بقى يقدر يبني الرد من text و charts و buttons و forms وأدوات صغيرة تفاعلية جوه المحادثة ذات نفسها.
مثال: لو سألته “لو حوّشت 2,500 جنيه في الشهر، هيبقى معايا كام بعد 5 سنين؟”، ممكن بدل ما يكتبلك فقرة، يعملك calculator صغير تغيّر فيه الأرقام بنفسك وتشوف النتيجة على chart.
الجميل في الموضوع:
مش محتاج prompt خاص: الموديل هو اللي بيقرر إمتى الرد يبقى نص وإمتى يبقى أداة، ولو عاوز أداة معينة، تقدر تطلبها.
الـ UI بيظهر وهو بيتبني: OpenAI عاملة مكتبة native components و compiler بيعرض الواجهة وهي بتتولّد، فمش هتستنى لحد ما يخلص.
الميزة في الـ Chat بس: مش في Work ولا Codex.
طب الفايدة لينا ايه كمبرمجين:
ده اسمه Generative UI، والفكرة دلوقتي بقت إن الموديل قادر إنه يولّد واجهة مش نص، فلو بتبني منتج فيه chatbot، اسأل نفسك: هل كل رد لازم يبقى نص؟ ولا فيه ردود الأحسن تبقى table أو form أو chart؟
ونصيحة مهمة: الـ chart اللي ChatGPT عمله محتاج نفس المراجعة اللي بتعملها لأي رد نصي طبيعي جدًا .. فشكله الحلو مش معناه إن أرقامه صح! 😂
Anthropic Ditched Git and Built Scion
شركة Anthropic نشرت engineering post يوم 13 أكتوبر بتقول فيه إنها شالت Git من الـ monorepo بتاعها، وحطت مكانه نظام version control جديد بنته بنفسها اسمه Scion.
طب ليه؟ الأرقام هنا هي اللي بتحكي القصة:
عدد مهول من الـ merges: في مايو كانوا بيعملوا حوالي 2,500 merge في اليوم، وفي سبتمبر بقوا أكتر من 30,000، يعني أكتر من 12 ضعف في 4 شهور بس. والسبب الأساسي في ده طبعًا كان الـ coding agents بتوع Claude.
الـ repo بقى ضخم: الـ History بتاع الـ main branch وصل لحوالي 100GB، وفيه أكتر من 25 مليون CI checkout في اليوم .. لو كل checkout سحب الـ repo بالطريقة العادية، كان هيبقى أكتر من 600 PB traffic في اليوم.
والموضوع بقى صعب جداً في الـ Maintenance.
والفكرة هنا: إن الـ Git لما اتصمم كان متصمم على افتراض إن كل developer عنده نسخة كاملة من الـ repo، ويقدر يشتغل offline، وده بالفعل افتراض منطقي جداً لاي بني آدم!
بس الـ agents مش كده .. الـ agent دايماً online، ومحتاج غالباً كام ملف بس مش الـ repo كله.
فـ Scion قلب الفكرة:
الـ clients دايماً online.
الـ server هو اللي شايل الشغل التقيل: الـ History وعمليات الـ merge عنده.
الـ packfiles: شالوا الـ packfiles بتاعة Git خالص والـ packfiles في Git هي ملفات مضغوطة تُستخدم لتخزين الملفات، والتعديلات بكفاءة عالية لتوفير المساحة وتسريع العمليات.
والفكرة دي مش جديدة 100% ، لان Anthropic بتقول إنها استلهمتها من أنظمة زي Piper بتاع Google و Sapling بتاع Meta، اللي اتعملوا لنفس المشكلة: الـ monorepos العملاقة.
النتايج:
استهلاك أقل بكتير: الـ CPU والميموري بقوا أقل 200 مرة من الـ Git mirrors القديمة.
سرعة: الـ checkout نزل من دقايق لثواني.
تحسن كبير في الـ CI: وفّروا حوالي 25% من الـ CPU.
وكل ده تم من خلال فريق مكون من 7 مهندسين، هم الي بنوه ونقلوا الـ monorepo كله في 5 شهور، و Claude هو اللي كتب أغلب الكود، فالمهندسين حطوا الـ architecture والأهداف، والموديل نفّذ.
طب الفايدة لينا ايه كمبرمجين:
المفروض إن Anthropic نفسها بتقول بوضوح إن Scion مش بديل لـ Git للاستخدام العام، ومش هتعمله open source .. ولكن اللي عاوزاه إن GitHub و GitLab لازم ياخدوا الأفكار، ويبدأوا يشتغلوا في بدايل لإن تطور الـ Agents كل مدى بيتطور بشكل أسرع .. والأساليب التقليدية هتبقى دايمًا هي الـ Bottleneck.
فالأدوات اللي اتصممت لبني آدم ممكن تتكسر لما الـ agents يستخدموها على نطاق كبير. و Anthropic متوقعة إن فرق تانية هتوصل لنفس الحدود دي خلال 6 لـ 12 شهر.
Figma announces Specs to help guide AI agents
أعلنت Figma عن Specs وده عبارة عن markdown editor بتكتب فيه لغة التصميم بتاع شركتك، والمصممين والـ AI agents يرجعوله وهم شغالين.
ليه محتاجين حاجة زي كده؟
لأن الموديلات بتطلّع نتايج مختلفة من نفس الـ prompt، فلو قلت لـ agent “اعملي صفحة pricing”، هيعملها بشكل. ولو قلتها تاني، ممكن يعملها بشكل تاني خالص، وغالباً مش شبه البراند بتاعك .. فبدل ما الـ agent يخمّن، Figma بتدّيله قواعد مكتوبة يمشي عليها.
إيه اللي يميّز Specs عن أي document عادي؟
عايشة جنب الشغل: تقدر تبقى ملف لوحدها أو جوه الـ canvas نفسه.
مربوطة بالتصميم الحقيقي: تقدر تشاور فيها على عناصر من التصميم، وتحط جواها FigJam diagrams و code layers.
كل الـ context في مكان واحد: تربط فيها الـ design libraries والـ code libraries والـ guidelines.
الـ agents بيتفاعلوا معاها: يقدروا يقروا التعليقات جوه Specs ويردّوا عليها.
ومعاها نزل كمان:
الـ Code Layers بقت public beta: تقدر تضيف كود للتصميم وتعمل prototype تفاعلي، أو تطلب من الـ agent يحوّل التصميم لكود.
دعم MCP لأكتر من 20 أداة: يعني agents من برّه Figma يقدروا يوصلوا لتصميماتك وقواعدك.
طب الفايدة لينا ايه كمبرمجين:
لو بتستخدم CLAUDE.md أو AGENTS.md أو .cursorrules في الـ repo بتاعك، فانت فاهم الفكرة كويس: ملف markdown بيقول للـ agent “في المشروع ده، احنا بنشتغل كده”.
فبكل بساطة Specs هي نفس الفكرة بالظبط، بس للتصميم.
والاتجاه هنا واضح: الـ spec المكتوب بقى هو الـ contract بين الفريق والـ agents، فاللي هيكسب مش اللي عنده أقوى موديل، ولكن اللي كاتب قواعده بوضوح وعارف يساعد ويستغل الـ agents انها تطلع أفضل شغل.
💬 دوركم انتم
الأخبار كلها بتقول نفس الحاجة من زوايا مختلفة .. السؤال مبقاش “هستخدم AI ولا لأ؟” زي زمان، ولكن بقى “أدواتي جاهزة للـ agents ولا لأ؟”
شاركونا في التعليقات: أنهي موضوع من التلاتة حسيتوا إنه هيأثر على شغلكم أكتر؟ الـ UI ولا Scion ولا الـ Specs؟
ولو العدد عجبكم، ابعتهوا لزمايلكم اللي لسه بيعملوا git push --force على main 😎
نشوفكم الأسبوع الجاي! 👋
بفضل الله أصبح متاح حالياَ دعمنا من خلال الرعاة والشراكات وفعلنا الـ Sponsorship, بنرحب بجميع الشراكات مع المؤسسات والشركات وأصحاب الأعمال لبناء مجتمع عربي يشجع على القراءة والتعلم ومشاركة التجارب والخبرات العملية في هندسة البرمجيات.
دورك كشريك أو راعي هيكون محوري في دعم المحتوى وتوسيع نطاق تأثيره. فانضم لرحلتنا وكن جزءًا من صناعة مستقبل التكنولوجيا في المنطقة 🚀
تقدروا تشوفوا التفاصيل كاملة من هنا والـ Analytics بتاعتنا من خلال اقرأ-تِك والنشرة الأسبوعية 👇
